Anëtarët e Unionit Evropian të Transmetuesve (EBU) kanë konfirmuar se Izraeli do të mbetet pjesë e Eurovision Song Contest. Vendimi u mor në Asamblenë e Përgjithshme në Gjenevë, pas shqyrtimit të rregullave të përditësuara të votimit dhe diskutimeve mbi shqetësimet lidhur me pjesëmarrjen e Izraelit.

Çështja kryesore e diskutimit ishte pjesëmarrja e Izraelit në Eurovision, pas protestave të shumta për sjelljen e Izraelit në luftën në Gaza dhe pretendimeve se qeveria izraelite kishte ndikuar në mënyrë të padrejtë në votimin e konkurseve të fundit.

Anëtarët e EBU-së u pyetën të votonin në një ballotazh sekret nëse ishin të kënaqur me rregullat e reja të shpallura muajin e kaluar, pa pasur një votim mbi pjesëmarrjen në eventin e vitit tjetër.

Një shumicë e madhe e anëtarëve ra dakord se nuk kishte nevojë për një votim tjetër mbi pjesëmarrjen dhe se Eurovision Song Contest 2026 duhet të zhvillohet siç ishte planifikuar, me masat shtesë të sigurisë të vendosura.

Një votim mbi pjesëmarrjen e Izraelit nuk u zhvillua, prandaj Izraeli mbetet në Eurovision, dhe përgatitjet për konkursin e vitit të ardhshëm në Vjenë do të vazhdojnë sipas rregullave të përditësuara.

Pas diskutimit, Presidentja e EBU-së, Delphine Ernotte Cunci, tha se votimi tregon angazhimin e anëtarëve për të mbrojtur transparencën dhe besimin në Eurovision dhe falënderoi të gjithë për kontributet e tyre. Ajo theksoi se diskutimet sollën ndryshime të rëndësishme në rregulla, duke siguruar që konkursi të mbetet një vend për unitet dhe shkëmbim kulturor.

Në Eurovision 2025, Izraeli u rendit i dyti, kryesisht për shkak të votave të publikut. Rezultati shkaktoi kritika nga disa vende, të cilat thanë se Izraeli kishte rritur artificialisht mbështetjen e tij përmes një fushate të gjerë reklamuese që nxitte europianët të votonin për pjesëmarrjen e tij.

Më parë këtë muaj, EBU shpalli ndryshime në rregullat e votimit për të kufizuar ndikimin e qeverive dhe fushatat promovuese të koordinuara. Ndryshimet përfshijnë: fansat do të mund të japin vetëm 10 vota në vend të 20, do të merren masa kundër votimit të koordinuar ose mashtrues, dhe juritë do të kthehen në gjysmëfinale.

Disa transmetues kishin shprehur qëndrimet e tyre para mbledhjes: Irlanda, Spanja, Holanda dhe Sllovenia kishin kërcënuar të bojkotonin Eurovision nëse Izraeli do të merrte pjesë. Ndërsa disa vende të tjera, si Gjermania dhe Austria, mbështesnin pjesëmarrjen e Izraelit, duke e konsideruar atë “pjesë të pandashme të Eurovisionit”.